Blodau Drain Duon/Siôn

← Y Tri Brawd

Blodau Drain Duon gan Thomas Jacob Thomas (Sarnicol)

Cwyn y Bardd-Bregethwr →

SIÔN

PAN oedd Siôn heb ddim, 'doedd neb yn y fro
Yn pryderu fawr am ei enaid o.
Ond daeth tro ar fyd, y mae Siôn yn awr
Wedi dyfod yn berchen golud mawr;
A gwelir yr eglwysi i gyd
Yn ceisio ei ennill i mewn o'r byd.
O'r seti mawr fe gyfyd cri:
"Rhaid ei gael yn aelod gyda ni!"
Aeth Siôn yn gyfoethog, a phawb drwy'r fro
Yn cystadlu am achub ei enaid o.