Caniadau Barlwydon Llyfr 1/Y Milwr

← Yr Afal

Caniadau Barlwydon Llyfr 1 gan Robert John Davies (Barlwydon)

Yr Heidden →

Y MILWR.
(Y Gerddoriaeth gan Mr, Wilfrid Jones, R, A. M, Wrecsam,)

NOD fy mywyd, beth yw hwnw,
Bod yn filwr dros fy ngwlad ;
Bod yn ddewr a gwisgo'r cleddyf
Dania 'm hysbryd o fwynhad.
Mae rhyw hiraeth cryf aflonydd
Yn cyniwair drwy fy mron;
'Rwy'n dirmygu saethau'r gelyn,—
Cerddaf tua'r gad yn llon.

Cychwyn wnaf, ond rhaid ffarwelio,—
Rhaid wrth ddewrder i wneyd hyn ;
Mae fy nghalon yn glymedig
O fewn rhwymau serch yn dyn.
Dagrau gloywon fy Anwylyd
Ydynt saethau i fy mron:
Dyma allu i'w orchfygu
Mwy ei nerth na'r waew—ffon.

Os gorchfygais ddagrau cariad,
Nid oes gelyn mewn un gâd
All lesgâu fy mhenderfyniad
"Bod yn filwr dros fy ngwlad."
Gwnaf, ymladdaf a gorchfygaf,
Rhag pob gormes byddaf bur;
Cerfiaf "Fuddugoliaeth" eglur
Ar fy nryll a'm cleddyf dur.