Caniadau Watcyn Wyn/Adgofion

← Colli'r Trên

Caniadau Watcyn Wyn gan Watkin Hezekiah Williams (Watcyn Wyn)

Y Llew →

ADGOFION.

PAN yw bysedd y blynyddau
Wedi plethu ar fy mhen
Yn sidanaidd laes gydynau
Goron flodau almon wèn;
Ydwyf megys yn breuddwydio
Am y tymor 's llawer dydd;
Ai myfi yw 'r un fu 'n gwisgo
Blodau i'enctyd ar fy ngrudd.
Dros ei ysgwydd heb yn wybod,
Adgof fel yn tremio sydd,
Lawer gwaith yn hyd diwrnod
Ar y dyddiau 's llawer dydd.

Mor gymysglyd yw'r olygfa,
Pan yn edrych ar fy hynt;
Llawer cwmwl ar fy ngyrfa,
Rhyngwyf sydd â'r amser gynt;
Ond mae llanerch boreu bywyd
Byth yn ddysglaer, byth yn glir;
Gallwn feddwl fod haul gwynfyd
Yn tywynu ar y tir.

Ddedwydd oriau! maent yr awrhon
I fy mron yn taflu hedd;
Tremio 'n ol sy'n twymo 'r galon
Ar derfynau oer y bedd;
Mae adgofion ambell eiliad
Yn fy llesgedd ar fin tranc,

Yn fy nwyn, o ran y teimlad,
Yr un fath a phan yn llanc.

Gallwn feddwl fod calonau
Pawb y dyddiau hyny 'n bur;
Nad oedd achos o ofidiau
Nad oedd defnydd poen a chur;
Gwenau serch ar bawb yn disgyn
Fel pelydrau haul ar fryn;
Er nas gallaf ond trwy 'r deigryn,
Edrych ar y dyddiau hyn.

O! flynyddoedd fy ieuenctyd,
Oriau pur o hedd i gyd;
O felusder eich dedwyddyd
Sugnaf gysur yn y byd;
Er i'ch dyddiau hafaidd gilio
Fel y niwl o flaen y gwynt;
Yn fy henaint caf adgofio—
Melus gofio 'r amser gynt.
Dros ei ysgwydd heb yn wybod
Adgof fel yn tremio sydd,
Lawer gwaith yn hyd diwrnod
Ar y dyddiau 's llawer dydd.