Cerddi'r Bwthyn/Unigeddau

← Hen Fwthyn

Cerddi'r Bwthyn gan Dewi Emrys

Y Medelwyr →

UNIGEDDAU

LLE brysiai llaweroedd heibio,
A'm rhwystro bob ennyd awr,
Trwy wacter y cerddwn, fugeilfab dwys,
Ar balmant y ddinas fawr.
O! na chawn ddilyn hen lwybrau'r ffridd
A phlannu fy nhraed yn y sofl a'r pridd!

Clywn dorf yn addoli'n llafar,
A'r lleisiau'n ddwy fil neu fwy,
A phibau'r organ yn rhuo clod
Y duw a adwaenent hwy,
A minnau'n cofio am wlithog lain
A hen gyfrinfa'r "llef ddistaw fain."

Aed esgob dan gromen euraid,
Aed mynach i nos ei gell,
I minnau adfered y lloer a'r sêr
Sancteiddrwydd y bryndir pell!
A baid organau a lleisiau byw
Na bydd huodledd i'r neb a glyw?