Englynion Goffa Hedd Wyn

Y bardd trwm dan bridd dramor, - y ddwylaw

Na ddidolir rhagor:

Y llygaid dwys dan ddwys ddôr,

Y llygaid na all agor!

Wedi ei fyw y mae dy fywyd, - dy rawd

Wedi ei rhedeg hefyd:

Daeth awr i fynd i'th weryd,

A daeth i ben deithio byd.

Tyner yw'r lleuad heno - tros fawnog

Trawsfynydd yn dringo:

Tithau'n drist a than dy rô

Ger y ffos ddu'n gorffwyso.

Trawsfynydd! Tros ei feini - trafeiliaist

Ar foelydd Eryri:

Troedio wnest ei rhedyn hi,

Hunaist ymhell ohoni.