I Merch Lân

gan Tomos Prys

Cerais wiwferch, cwrs ufudd,

a’r dagrau oll ‘rhyd y grudd.

Os tlws oedd Fenws feinwedd

a gloyw’n wir â glân wedd,

tlysach a gloywach mewn gwlad,

er fy nghur, yw fy nghariad.

Os glân ydoedd ychwaneg

Minerfa, Deinna deg,

dau lanach ydyw ‘leni

yng nghwr dail fy nghariad i.

Os hardd oedd Balas hirddoeth

a Dsuwno neu Ddeido ddoeth,

harddach, pereiddiach yw pryf

y fun olau, f’anwylyd.

Os iriadd fynwes arian

Medea, Luwcresia Lân,

ireiddiach, hoywach yw hon,

gwawr gulael a’m gwir galon.

Os gwen fu Elen ennyd

a glân o beth glain y byd,

dau wynnach ydyw wyneb

fy nghariad, yn anad neb.

Diolched gwen feinwen fau

Ei glaned ar ei gliniau.