Ieuan Glan Geirionydd (Cyfres y Fil)/Hynt y Meddwyn. Boreu'r Briodas

← Boreu Rhewllyd

Ieuan Glan Geirionydd (Cyfres y Fil) gan Evan Evans (Ieuan Glan Geirionydd) golygwyd gan Owen Morgan Edwards

Hynt y Meddwyn. Y Dychweliad →

HYNT Y MEDDWYN.
RHAN I.

Bore'r Briodas.
Alaw.—"GEIRIONYDD."

YN bore hyfryd, teg o Fai, hir gofir am y tro,
Yr unwyd John a Jane ynghyd, dau flodyn hardda'r fro;
Pawb oedd yn fyw y bore hwn trwy'r pentref ymhob man,
I weled dau mor fawr eu parch yn hwylio tua'r Llan.

John Jones o'r Plas y gelwid ef, lle bu am dymor maith
Yn brif weinidog ffyddlon iawn, dieilydd yn ei waith;
Ei wyneb a arliwid gan wych bwyntil Dirwest hardd,
Mor iach ei wedd a theg ei lun ag Adda yn yr ardd.

Jane Jones o'r Plas fu hithau'n hir, yn fawr ei chlod a'i bri;
Tylawd, cyfoethog, mawr a bach, pob gradd a'i parchent hi;
'Doedd neb yn well ei swydd na Jane, na neb yn fwy ei dawn,
Fel arolyges ar y Plas, yn gall a gonest ia wn.

Erioed ni roddwyd dan yr iau ddau gymar mor gytun,
I dynnu'u cwys mor deg i'r pen, yn hardd a llefn ei llun;

Pawb oedd yn d'rogan gyrfa hir, mewn llwydd a gwynfyd llawn,
I John a Jane i fyw ynghyd o foreu hyd brydnawn.

Fel Isaac a Rebecca gynt y teg argoelai'u byd,
Mewn perffaith gysur pur diloes drwy oriau'u hoes o hyd;
Dan nodded ac ewyllys da Preswylydd mawr y berth,
Yr hwn a wlawiai ar y ddau bob breintiau gore'u gwerth.