Sanctaidd, sanctaidd, sanctaidd, Dduw hollalluog

←

Sanctaidd, sanctaidd, sanctaidd, Dduw hollalluog gan Reginald Heber wedi'i gyfieithu gan Evan Rees (Dyfed)

Trugaredd Duw i'n plith →

Mynegai Llyfr Emynau y Methodistiaid Calfinaidd a Wesleaidd 1930

Yr Esgob Reginald Heber

1^[1] Mawl i'r Drindod.
11. 12. 12. 10.

1. SANCTAIDD, sanctaidd, sanctaidd, Dduw Hollalluog!
Gyda gwawr y bore dyrchafwn fawl i Ti;
Sanctaidd, sanctaidd, sanctaidd, cadarn a thrugarog!
Trindod fendigaid yw ein Harglwydd ni!

2. Sanctaidd, sanctaidd, sanctaidd!—nef waredigion
Fwriant eu coronau yn ŵylaidd wrth dy droed;
Plygu mae seraffiaid, mewn addoliad ffyddlon,
O flaen eu Crewr sydd yr un erioed.

3. Sanctaidd, sanctaidd, sanctaidd! cwmwl a'th gylchyna,
Gweled dy ogoniant ni all anianol un;
Unig Sanctaidd ydwyt, dwyfol bur Jehofa,
Perffaith mewn gallu, cariad, wyt dy Hun.

4. Sanctaidd, sanctaidd, sanctaidd, Dduw Hollalluog!
Datgan nef a daear eu mawl i'th enw Di:
Sanctaidd, sanctaidd, sanctaidd, cadarn a thrugarog
Trindod fendigaid yw ein Harglwydd ni!

—Reginald Heber (1783–1826)
Cyfieithiad—Parch Evan Rees (Dyfed 1850—1923)

Ffynhonnell

1. Emyn rhif 1, Llyfr Emynau y Methodistiaid Calfinaidd a Wesleaidd 1930