Ar ol darllen llinellau Andronicus yn y Genedl yr wythnos ddiweddaf, ar
y testyn "A gaf fi fendio eto," fel hyn yr ysgrifena Mr. W. O.
Roberts (Madryn), The Groves, Caerlleon.
Os na chei yma, gyfaill,
Yr adeg fel y bu,
Os na chei di ymadael
A'r crydcymalau du;
Os na chei wel'd, a theimlo,
A llwyr fwynhau iachad,
Er hyny cei ymddiried
Dy enaid i dy Dad.
Os na chei rodio'n heinyf
Ar lanau'r Fenai fwyn,
A theithio oddiamgylch ogylch
Drwy Gymru yn ddigŵyn;
Os na chei ysgrifenu
Y llithoedd gwresog byw,
Mae eto ar dy gyfer
Drysorau gras ein Duw.
Os na chei eto ddarbod
Am dy anwyliaid llon,
A bod yn amddiffynydd
I'r fun roes iti fron;
Os na chei borthi bychain
Diaddysg Arfon dre',
Gofala'r Nef am gigfran
I'w porthi yn dy le.
Os na chei eto fendio
A rhodio is y rhod,
Mor iachus, sionc, a heinyf,
Fel buost ti erioed;
Cei foli'r Iôr mewn blinder
A llawnder mawr o nerth;
Fe gân y fron dan gystudd,
Fel eos yn y berth.
|
