Tudalen:Cofiant y Parch Isaac Morgan Harry.djvu/42

Arosodd yn ardal y Bala
Nes magu grymusder a nerth,
Mae'n awr wedi lledu dros Gymru,
Pwy dafod all draethu ei gwerth?

Mae'i meibion a'i merched yn filoedd—
Ië, miloedd ar filoedd yn awr;
Pe'u gwelid hwy oll yn yr unlle,
B'le gwelwyd cyn'lleidfa mor fawr;
Mae'n dangos i ddyn ei drueni,
Ei bechod a'i gulni o hyd;
Mae'n dangos Mab Mair yn wirfoddol
Yn marw dros bechod y byd.

Mae'n dangos y codwm yn Eden,
Mae'n dangos marwolaeth y gro's,
Fel haulwen daeth allan o'i 'stafell,
Nes ymlid tywyllwch y nos;
Mae'r Ysgol Sabbothol yn famaeth
Dysgeidiaeth i dlodion y wlad,
'Does yma ddim arian yn pasio,
Mae'r llafur a'r llyfrau yn rhad.

Mae'i llwyddiant o hyd yn dibynu
Ar haeddiant yr Aberth mor ddrud,
Hi lwydda yn enw'r Eiriolwr,
Nes gyru'r eilunod o'r byd;
'Rwyf inau'n dymuno ei llwyddiant
Yn haeddiant fy Mhrynwr a'm Pen,
A dyma fydd rhan o fy ngweddi,
'Rwy'n awr yn diweddu. Amen.