TOMOS,—"Edrych pwy sydd yna, Rhys."
(WIL a SUS wrth y drws).
WIL BRYAN,—"Found at last. Mi fuon ni acw yn edrach am danat, a mi ddeydodd Miss Hughes dy fod wedi dwad yma. And to kill two birds with one stone, drwy ymweld â'r hen thorough—breds, mi ddeuthom yma ar dy ol di."
RHYS,—"Dowch i fewn."
TOMOS,—"Wel, William, mi 'rwyt ti'n edrych yn dda. A mae Sus yn edrach yn reit hapus."
WIL BRYAN,—"Wel, Mrs. Bartley, sut yr ydach chi?"
TOMOS,—"Dydi Barbara ddim fel hi ei hun heno. Feder hi ddim symud o'r gader. Mae hi cyn wanned a chyw giar. Rhaid i chi'ch dau gymeryd rhwbeth at y'ch penne: dowch at y bwrdd, closiwch Sus; dowch, peidiwch bod yn swil. Sut mae'r hen bobol, William? Hwdiwch, byclwch ati. Mae yma ddigon o fwyd fel y mae o."
WIL BRYAN,—"Dydi'r gaffer ddim quite up to the knocker heno."
TOMOS,—"Ho! y tywydd, debicin i. Fydda i'n wastad yn deyd fod y tywydd yn effeithio ar rai pobol. Lwc garw na phriododd Barbara mo dy dad, wel di. Cyn y prioda i eto, Sus, 'dwyt ti'n byta dim,—mi ofala i gael gwraig nad ydi'r tywydd ddim yn effeithio ar 'i hiechyd hi. Nid am fod gen i ddim yn erbyn Barbara, cofia, yr ydw i'n ffond iawn o Barbara,—mi feder hi ddeyd hynny, achos, ar ol colli Seth, 'does gen i neb ond y ddau fochyn a'r ffowls ene, 'blaw Barbara."
BARBARA,—"Ydi o'n wir, William, dy fod di yn mynd i briodi?"
RHYS,—"Rhaid i chi ddim swilio'ch dau. Ydi o'n wir?"
WIL BRYAN, "Fel secret, gan ddisgwyl nad eiff o ddim ymhellach, yr ydw i'n deyd wrthoch chi yma fod ene o'r diwedd definite understanding rhwng Sus a minne, ac yn wir ynglŷn â'r cwestiwn yna y daethom i yma i edrach am Rhys"
TOMOS,—"Barbara, rhaid i ni ladd y mochyn cynffon gwta yna, er mwyn i ni fedru rhoi clamp o ddarn o asen fras iddyn nhw yn wedding present. Pryd yr ydach chi yn mynd, William?
WIL BRYAN,—"Mae hynny yn dibynnu ar Rhys yma."
