Prawfddarllenwyd y dudalen hon
Eithr pan ddilynwyf bydd tro cyfrwysach
A llecyn glasach ymlaen o hyd.
Felly y'm hudir o awr i awr
Ar daith anorffen yr ymbil mawr.
Dichon y'm gelwi yn wrthryfelwr,
Eithr mwy na therfyn yw dyn o hyd.
Bwriodd ffordd dros y cefnfor llydan,
Plannodd ei droed yn eithafoedd byd;
Ac ni cheir dewin tan haul y nef
A ddwed lle derfydd ei siwrnai ef.
Eithr pwy a ddilyn ei ymdaith heddiw
Na ddaw i fangre'r didostur hedd?
Collir ei gamre mewn niwl anghyffred,
A'r tyst agosaf fydd carreg fedd.
Yno bu'r holi mawr erioed,
A'r chwilio ofer am ôl ei droed.
