Prawfddarllenwyd y dudalen hon
Aeth o'm blaen, a phennod euraid
Ar ei hanner yn ei law;
Mynnai y câi orffen honno
Mewn gorffwysfa brydferth draw.
A ddaw ef i'm cwrdd tan chwerthin
Imi ameu ennyd awr?
Gwn mor felys fyddai'n cymun
Hwnt i sŵn y cystudd mawr.
Dros hen fagwyr werdd, fwsoglyd,
Gwelaf erw'r bythol hedd;
Ac ar len o niwl anniflan,
Gwelaf gysgod carreg fedd.
Eithr os mynnwch fod fy ngyrfa
Yn ymestyn hwnt i'r llen,
Cleddwch fi ar fin yr heol,
A charreg filltir uwch fy mhen.
