Bro fy Mebyd a Chaniadau Eraill/Rhosyn ar y Drain
| ← Elis o'r Nant | Bro fy Mebyd a Chaniadau Eraill gan Humphrey Jones (Bryfdir) |
Glan y Môr → |
RHOSYN AR Y DRAIN.
AR flodau Eden Mebyd
Disgynnodd cafod erch,
A'i chesair yn ymyryd
A thegwch bro fy serch;
Ar waethaf cystudd meddwl,
A llawer dybryd sain,
'Roedd bwa ar y cwmwl
A rhosyn ar y drain.
Mi welais fam yn myned
I'r glyn a'i gruddiau'n glaf;
Mi welais fedd agored
Rhwng llwyni gwyrddion haf;
Ei gweddi dros ei bachgen,—
Ei llef, llef ddistaw, fain,
Sy'n oedi ar ei haden;
'Roedd rhosyn ar y drain.
Gollyngais fab fy mynwes
I'r heldrin dros y don; '
Does neb a ddywed hanes
Pryderon dyfna' mron;
Distawodd twrf cyfanfyd,
Y cledd roed yn ei wain,
Mae'r bachgen yn y Pwlpud
A rhosyn ar y drain.
Dilynnais yn fy rhysedd,
Hudoliaeth nwydau gwyllt;
Wrth gofio'r hen oferedd
Fy nghalon wan a hyllt;
Ym mhabell y cyfarfod
Llareiddiodd gras y rhain,
Daeth enfys ar y gawod
A rhosyn ar y drain.