Bro fy Mebyd a Chaniadau Eraill/Rhwyfo

← Glan y Môr

Bro fy Mebyd a Chaniadau Eraill gan Humphrey Jones (Bryfdir)

Ysbryd y Môr →

RHWYFO.

I.

ESMWYTHED nawf yr awel;
Daweled cwsg y don;
Brydferthed yw y gorwel
Yng ngwrid yı hafnos hon;
Caiff Nel a minnau hamdden
Oludog o fwynhad,
Wrth ganu dan y lasnen
A rhwyfo'n hysgafn fad.

Mae Nel a minnau'n ieuanc
Fel dail y goedlan werdd,
A Phryder wedi dianc
O'r bad yn swn ein cerdd.

II.

Mae'r hafddydd wedi cilio;
Mae'r Wyddfa dan ei lluwch;
Mae ton yn ymffyrnigo
I ddringo ton yn uwch;
Mae'r ddau fu gynt ym morio
Yn awr yn fam a thad,
Ac wedi cynefino
A byw i rwyfo'r bad.

Mae Nel a minnau'n hynach
Na'r crinddail ar y coed,
Ein serch sydd yn ieuengach
Er hynny nag erioed.

III.

Mae'r wybren dan gysgodau,—
Cysgodau Hydref oes;
Mae barrug hyd y cangau
A'r gwynt yn chwythu'n groes;
Ond yn y bad cydrwyfo
Mae'r ddau fu'n caru gynt,
A dal i garu eto
Ar waetha'r don a'r gwynt.

Os yw y nos yn duo,
Mae'r ser yn britho'r nen,
A Nel a minnau'n rhwy fo
Am borth y Wawrddydd Wen.