Gwaith Ann Griffiths/Llythyr 7
| ← Llythyr 6 | Gwaith Ann Griffiths gan Ann Griffiths |
Llythyr 8 |
GAREDIG FRAWD,—
Cefais gyfleusdra i anfon yr ychydig leiniau hyn attoch i'ch gwneuthur yn hyspys fy mod wedi derbyn eich llythyr gyda charedigrwydd
Yn y fan yma y mae dalen wedi ei rhwyso o'r ysgriflyfr, a rhaid i mi godi y darn nesaf o'r copiau argraffedig.
ac y mae yn dda gennyf gael cyfleusdra i anfon fy helynt presenol i chwi.
Anwyl frawd, ni fum i erioed yn ymddiddan a chwi, nac yn ysgrifennu attoch, gyda golwg mor wael arnaf fy hun a'r tro hwn; ac yr wyf yn cywilyddio wrth feddwl fod genyf erioed olwg wahanol. Daeth y gair hwn i'm meddwl, "Rhoddais ger dy fron ddrws agored, na ddichon neb ei gau, canys y mae gennyt ychydig nerth." Diolch byth i Dduw pob gras am gymeryd ei air gwerthfawr yn ei law i'm trin; yr wyf yn parchus gredu mai felly y mae, a bod ei arfau ef a'u hergydion yn barhaus ar y gwreiddyn o hunan-dyb sydd mor gryf yn fy natur lygredig. Eglurwyd mwy imi o'm cyflwr collfarnedig er's ychydig ddyddiau nag yn holl ysbaid fy mhroffes, a mwy o ogoniant trefn ddoeth Duw yn cyfiawnhau yr annuwiol, a'i fod yng Nghrist yn cymodi y byd ag ef ei hun heb gyfrif iddynt eu pechodau. Yr wyf yn ami wrth orsedd gras yn rhyfeddu, diolch, a gweddio; rhyfeddu fod y Gair a'r Ysbryd Glân wedi cael ffordd i drin cyflwr y fath adyn llygredig, llawn o bob twyll, heb fy lladd. Diolch am gyfreithlondeb ffordd iachawdwriaeth; ac am ei bod yn gwobrwyo ei theithwyr. Yr wyf yn gweddio am gael treulio y gweddill sydd yn ol o'm dyddiau yn fywyd o gymdeithasu â Duw yn ei Fab Iesu Grist, y Cyfryngwr mawr rhwng Duw a dynion.
Byddai yn werthfawr iawn genyf gael fy ngwaredu rhag anturio cynnyg mwyach i ddeddf sanctaidd Duw ond yr hyn a'i boddlonodd; nid am na dderbyn ddim arall, ond o barch iddi. Nid adnabum i o'r blaen gymaint o barch i, ac o gariad at y ddeddf; nid er ei bod yn melldithio, ond am ei bod yn melldithio, ym mhob man allan o Gyfryngwr; canys felly y mae yn dangos ei harddwch a'i pherffeithrwydd.
Garedig frawd, bu dda genyf ddarllen y llythyr a anfonasoch at fy mrawd, ac hefyd eich llythyr at S. G. a'ch anogaethau i ddarllen a chwilio yr Ysgrythyrau; yr wyf yn meddwl am ba bethau bynnag a fyddo genym heblaw y gair, a'r hyn a fyddo yn unol âg ef, ein bod yn gwario arian am yr hyn nid yw fara a'n llafur am yr hyn nid yw yn digoni," oblegid nid yw ystumog yr anian newydd yn dygymod a dim arall; ac y mae pob awelon yn dwyn afiechyd, ond awelon y cysegr. Bu y geiriau canlynol o werth a chysur mawr i fy enaid yn ddiweddar, sef—"Dy wddf sydd fel tŵr Dafydd, yr hwn a adeiladwyd yn dy arfau; tariannau fil sydd yn crogi ynddo, i gyd yn estylch y cedyrn." Nid wyf fi ynnof fy hun ond dinerth a di-arfogaeth i wynebu gelynion; ond os caf fraint o droi i'r Tŵr, caf yno arfogaeth a nerth i redeg trwy'r fyddin. Bu y geiriau hyn hefyd o gysur mawr i mi—"Rhyngodd bodd i'r Tad drigo o bob cyflawnder ynddo Ef;" a hefyd y geiriau hyn—"Gardd gauedig yw fy chwaer a'm dyweddi." Y mae rhwymau mawr arnaf i ddwedyd yn dda am Dduw, ac i fod yn ddiolchgar iddo, am raddau o gymdeithas y dirgelwch. Ond dyma fy ngofid—methu aros—parhaus ymadael.
Yr wyf yn gweled fy ngholled yn fawr oblegid hyn; ond y dianrhydedd a'r amharch ar Dduw sydd fwy na hynny. Help i aros. Y mae y gair hwn yn aml ar fy meddwl—"Myfyria ar y pethau hyn, ac yn y pethau hyn aros." Dymunaf arnoch anfon i mi eich golygiad ar y gair hwnnw—"Wedi ei demtio ym mhob peth yr un ffuuud a ninnau, eto heb bechod." Y mae yr olwg isel sydd ar achos Duw mewn amryw fannau yn gwasgu yn ddwys ar fy meddwl. Y mae rhwymau mawrion ar bob enaid deffrous i ymdrechu llawer â Duw mewn taer weddi, am iddo anfon y gwyntoedd i chwythu ar ei ardd wywedig, fel y gwasgarer ei pheraroglau; fel y byddo Satan a holl ddeiliaid ei deyrnas
- Yma yr oedd diwedd y ddalen goll; mae'r gweddill o lawysgrif John Hughes.
yn colli ei hanadl gan rym yr arogl. Yn awr i ddibenu. Dymunaf arnoch fy nghofio ger gorsedd gras. Dymunaf arnoch anfon llythyr attaf gyda cyfleusdra cyntaf. A hyn oddiwrth eich anheilwng chwaer sy'n cyflym drafaelu trwy fyd o amser i'r byd a beri byth.