Gwaith Ceiriog/A ddywedaist ti fod Cymru'n dlawd

Gwaith Ceiriog

gan John Ceiriog Hughes (Ceiriog)

A DDWEDAIST TI FOD CYMRU 'N DLAWD

A ddwedaist ti fod Cymru'n dlawd,
Am fod ei llannau'n llonydd,
A thithau 'th hun yn cloddio, frawd,
Ym mryniau aur Meirionnydd?
Mae mwy o gyfoeth tan dy droed,
Na ddaeth i galon dyn erioed,
Anwiredd mwy erioed ni wnawd—
Na ddywed byth fod Cymru'n dlawd.

I ble y trown o fewn y tir,
Nas gwelir mŵn ei meini
Nad yw'r meteloedd o'u gwelyâu
Yn edrych am oleuni,
Nad yw y prês a'r arian faen,
Yn galw ar bob Cymro'n mlaen,
I roi ei ffydd a threio 'i ffawd
Yn holl oludoedd "Cymru dlawd?"

Estyna'th fys pan glywot hyn,
Yn cael ei ddweyd am Gymru,
At unrhyw graig, at unrhyw fryn,
Fo'n edrych ar i fyny.
Mae'r nentydd oll wrth fynd i'r aig
A cherrig ateb ym mhob craig,
Yn dwedyd "Nac yw" gyda gwawd—
Na ddywed byth fod Cymru'n dlawd.